Fuqia e solidaritetit klasor dhe e ekzistencës së sindikatave punëtore klasore shfaqet përmes letrës së falënderimit të një punëtori emigrant nga Kina, i cili u lëndua gjatë një aksidenti në orarin e punës, drejtuar Sindikatës së Ndërtuesve të Korfuzit.
Konkretisht, Xiang Tianxiao nga Kina punonte si ndërtues në Korfuz dhe, siç shënon në letrën e tij, punon në Greqi prej kohësh: «si shumë kolegë të mi, punoj shumë çdo ditë dhe luftoj për mëditjen».
Ai u lëndua gjatë orarit të punës dhe «pas aksidentit, u ndjeva i tmerruar dhe i pashpresë», pasi, siç shënon, si punëtor i huaj nuk i njihte ligjet dhe procedurat, ndërsa ekzistonte edhe pengesa e gjuhës, duke e vështirësuar edhe më shumë situatën. Megjithatë, siç thekson ai, «sindikatat punëtore greke nxituan të më ndihmonin në kohë, duke më ndihmuar të përballoja momentet më të vështira».
Duke iu referuar Sindikatës së Ndërtuesve të Korfuzit, ai shënon se kryetari i Sindikatës «bëri gjithçka për të më ndihmuar. Erdhi në kontakt me shërbime të ndryshme kompetente, më ndihmoi të ecja përpara me procedurat e nevojshme, më shpjegoi me durim të drejtat ligjore që u takojnë punëtorëve dhe lehtësoi vazhdimisht komunikimin dhe koordinimin për zgjidhjen e problemeve praktike, njëri pas tjetrit».
«Nuk më panë si një të huaj në një vend të huaj. Përkundrazi, më trajtuan sikur të isha anëtar i familjes së tyre» thekson ai.
«Është e vështirë që të lesh atdheun tënd dhe të punosh jashtë shtetit. Jemi larg vendit tonë dhe familjeve tona dhe është e pashmangshme të përballemi me ngjarje të papritura dhe vështirësi» shënon ai duke iu drejtuar kolegëve të tij nga Kina, dhe shton se nëse dikush gjendet në pozitë të vështirë apo pëson një aksident në punë «ju lutem mos e duroni në heshtje dhe mos pësoni panik», por t'i drejtohet Sindikatës.
«Ata do të dalin përpara për të siguruar të drejtat tona ligjore» shënon ai dhe falënderon punëtorët dhe sindikatat e Korfuzit që «kishin gjithmonë si prioritet interesat e punëtorëve dhe, pavarësisht se nga e kemi origjinën, sindikatat përbëjnë një strehë të besueshme për të gjithë punëtorët».
Sindikata e Ndërtuesve të Korfuzit gjendet e palëkundur në anën e punëtorëve, grekë dhe emigrantë. Kujtojmë, gjithashtu, se së fundmi Sindikata bëri ndërhyrje të njëpasnjëshme për kushtet çnjerëzore të jetesës së dhjetëra ndërtuesve nga Kina që punonin në ishull, në zonën e Barbati-t, dhe nën presionin e këtyre ndërhyrjeve punëtorët u zhvendosën në një hotel në zonën më të gjerë.