KΚE-TKP: Lufta jonë është e përbashkët kundër NATO-s, për përmbysjen e botës së shfrytëzimit dhe të luftës

Delegacion i Partisë Komuniste të Greqisë (KKE), i përbërë nga shokët Jorgo Marinos, anëtar i BP të KQ të KKE, dhe Aris Evangjelidhis, anëtar i KQ të KKE, mori pjesë në një manifestim të madh anti-NATO, të organizuar më 27/6/2026 në Stamboll nga Partia Komuniste e Turqisë (TKP).

Folësi kryesor në këtë aktivitet ishte Kemal Okuyan, Sekretar i Përgjithshëm i KQ të TKP, ndërsa një fjalim përshëndetës mbajti edhe J. Marinos, i cili theksoi si më poshtë:

«Falënderojmë përzemërsisht udhëheqjen e PK të Turqisë dhe përcjellim në këtë aktivitet të sotëm përshëndetjet më të ngrohta shoqërore të KKE. Ne mbështesim luftën e TKP dhe aktivitetet që ajo zhvillon, kundër Samitit të NATO-s. Dënojmë vendimin e autoriteteve turke për ndalimin e protestave në Ankara si dhe çdo lloj shtypjeje e dhune.

KKE është e pranishme në mënyrë militante në aktivitetet e TKP për të dënuar së bashku këtë "aleancë ujqërish" të klasës borgjeze dhe qeveritë e tyre që thurin plane të pista dhe përfshijnë popujt në luftëra dhe plane imperialiste.

NATO, që nga dita e parë e themelimit të saj në vitin 1949, ka qenë roja e kapitalizmit, dora e armatosur e imperializmit kundër popujve, një forcë antikomuniste me shënjestër të drejtuar nga Bashkimi Sovjetik, armike e ndërtimit socialist dhe e lëvizjes revolucionare.

Ajo vazhdon, edhe pas kundërrevolucionit, duke zgjeruar radhët e saj dhe duke ndërmarrë veprime të shumëllojshme ushtarake, me një rol të veçantë në antagonizmat e rrezikshme ndërkombëtare imperialiste.

Ne monitorojmë kontradiktat në kampin euroatlantik, midis SHBA dhe BE, dhe deklarojmë prerazi se çfarëdo forme që të marrë NATO –qoftë "globale" apo "europiane", model 2.0 apo 3.0, siç po diskutohet këto ditë– ajo do të jetë njëlloj e rrezikshme për popujt.

Anëtarësimi i njëkohshëm i Greqisë dhe Turqisë në NATO në vitin 1952 u shërbeu interesave të klasave borgjeze, dhe këtë gjë bën edhe sot, kundër popullit turk edhe atij grek, të cilët kanë pësuar pasoja të rënda nga kjo rrugë e përgjakshme e shënuar nga dhjetëra luftëra imperialiste, ndërhyrje dhe grushte shteti, nën udhëheqjen e SHBA dhe shteteve të fuqishme europiane.

KKE e dënoi themelimin e NATO-s dhe anëtarësimin e Greqisë në të, denoncoi qeverinë borgjeze të asaj kohe dhe partitë e tjera borgjeze, dhe i bëri thirrje popullit për rezistencë, në kushtet e një ilegaliteti të thellë ku ndodheshim.

40 ditë pas ratifikimit të anëtarësimit në NATO nga parlamenti grek, klasa borgjeze ekzekutoi dhe vrau komunistin, heroin Niko Belojanis.

Sot, KKE është në vijën e parë të frontit, organizatore e protestave të mëdha që vendi ynë të mos marrë pjesë në luftërat dhe ndërhyrjet e NATO-s e cila është protagoniste gjatë viteve të fundit, pas shpërthimit të luftës imperialiste në Ukrainë midis SHBA, NATO dhe BE nga njëra anë, dhe Rusisë kapitaliste nga ana tjetër.

Kemi organizuar qindra protesta pas sulmit kriminal të SHBA dhe Izraelit kundër Iranit, duke dënuar përfshirjen e thellë të vendit tonë me përgjegjësinë e qeverisë së ND dhe partive të tjera borgjeze.

Kemi realizuar marshime masive me mijëra popull drejt ambasadës amerikane, bllokime trenash, misionesh dhe ngarkesash të NATO-s. Protesta masive popullore kundër vizitave të anijeve amerikane dhe të NATO-s në portin e Pireut dhe në porte të tjera të vendit. Përleshje me forcat e policore dhe persekutime të shokëve tanë.

Ndjenjat anti-imperialiste të popullit tonë janë të rrënjosura thellë dhe nuk mund të zbuten nga mbrojtësit e imperializmit euroatlantik, partitë liberale dhe socialdemokrate, apo forcat e oportunizmit.

Ne luftojmë vazhdimisht për mbylljen e bazave ushtarake NATO-amerikane dhe për kthimin në atdhe të trupave të forcave të armatosura greke që janë dërguar në misione imperialiste jashtë kufijve.

Këto beteja janë të lidhura ngushtë me kauzën e madhe të përmbysjes së sistemit të kalbur kapitalist, për të hapur rrugën drejt shoqërisë socialiste-komuniste, për shkëputjen / ç angazhimin nga NATO dhe BE, me popullin në pushtet.

Ne u përgjigjemi me vendosmëri miteve që thonë se NATO dhe BE përbëjnë garanci për sigurinë e popujve. Çdo aleancë imperialiste shpreh dhe mbron interesat e monopoleve.

Ne vazhdojmë luftën tonë në kushtet e antagonizmave të ashpra imperialiste, të cilat shenjohen nga përballja SHBA-Kinë për fitoren e pozitës udhëheqëse në sistemin kapitalist, duke krijuar kushtet për luftëra të reja, të përgjithësuara.

Forcë katalizatore është lufta e pavarur e popujve për interesat e tyre, me organizatorë komunistët.

Forcojmë përpjekjet tona për të zhvilluar më tej solidaritetin, miqësinë dhe luftën e përbashkët të popullit turk dhe atij grek.

Partitë tona kanë ndërtuar marrëdhënie të forta shoqërore, marrin pjesë së bashku në Aksionin Komunist Europian dhe në Revistën Inspektimi Komunist Ndërkombëtar. Japin betejën për përmbysjen e botës së shfrytëzimit dhe të luftës, për ndërtimin e një bote të përparimit dhe mirëqenies, për socializmin-komunizmin, zhdukjen e shfrytëzimit të njeriut nga njeriu.

Rroftë internacionalizmi proletar! 

Rroftë lufta e përbashkët e TKP dhe KKE!»